Hasteo Simiya, Northeast ni Abono Puila (Photo Journalist) Corona Manjagwi Thowikha Chini Khorangni Khoroksa Mangpili Tisanai. Mung Jitendra Debbarma. Tongthai Jirania Bwkhaksteni Champaknagar Balaram Thakur Kami. Thowimani Jorao Bini Omar Wngkha Bisibwrwichidok (46).
Koktwmao Saimajakha Thowi thangnai Jitendra Debbarma, Salsni Romwi Sakhamya (Lomjak) tongmani. Aboni Slai Swkango bo, Borokni Kamio Kwbangma Lukurokno Lomlaijak tongmani. Phiya ba Corona Bemar no twiwi, Kisasuk Bororokni Kok Nathong, Kok Pirmungno Poito Chalaiwi, Corona Test Khlaijaklailiya Kamio Jotto Lukurok. Aboni Yagulno Sunani Nangkha Jitendra Debbarma. Hati Barsa Romwi Sakhamya wngwi tongwi bo, (Jora tongsani) Khlaijakliya Corona Test. Paithago Bini Lungh oh Major Infection (Nimonia) wngmani bai, Tangsal Horni Simi Bini, Langma Nanani (breathing problem) Jwngjal Achaikha. Aboni Bagwi Kraksal Phungo no (9:30am) bono Khumulwngni Kherengbar Sakham Nogo Twlangwi thangkha, Ganagini Nokni Bororok. Kherengbar Sakham Nogo Twlangmani Logilogi no Khlaijakha Bono Corona Test. Report Phainani bagwi 45 Minutes Suk Jora Nangkhona. Phiya ba Report Manani Swkangno Bini breathing problem wngphirmani bagwi, Oxizen Rwkha Bono Saknainairok. Phiya ba Bini Lungh oh Corona Infection Kwbangkuk wngmani bagwi, Lungh tei bini breathing tube oh wngkha Nimonia. Aboni bagwi Oxizen Rwphano, Oxizen Accept Khlailiya Bini Sak. Paithago Diporni 11.45am Tamphuru Takhuk Bukhuk, Motha (Maharma Sardar Baptist Church) tei Kami (Balaram Thakur) ni Jotto Lukurokno Kwlangkha Yakarwi.
Bini Thowimani Koktwma Mankheno, Kherengbar Sakham Nogo Dolai thangkha, Chini Khorangni Managing Director Mwchang Ranjit Debbarma no Khobwi Channel ni Kubun Adongrok. Kherengbar Sakham Nokni MOIC tei Sakham Nokni Saknainairok bai Koksalaimani Yakulo, Paithago Bini Mangkwthowi Kamio Rohornani Gosikha, Haste Sakham Bedekni Kwchuk Adongrok. Nangmani Jotto Official procedure Paimani Yakulo, Sarikni 4:17pm Tamphuru Kherengbar Sakham Nokni bono tubuwi phaijakha, Maharam Sardar Baptist Church ni Simalwngo. Bini Nukhungni Jotto Lukurok tei Kamini Bororok Paithak Borom Yapharmani Yakulo, Sarikni 5:36pm Tamphuru, Health Department ni Jotto Dagimung (Guidelines) tongmani Haikhe, Khlaijakha Bini Paithak Samung.
Phiya ba bo Thowima bai, Kami, Motha tei Amchaini Jotto Lukurokno, Yasi Surwi Phunugwi Kwlangkha Kaisa Kotor Swrungmung. Bo Thowimani bai Kamini Kaisa Kotor, Holongthai no Kwmakha Honwi Sakha, Balaram Thakur Kamini Secretary Mwchang Sunacharan Debbarma. Khakhamani Yapharmani Jorao bo taibo Sakha, Bwskangni Salo Abohai Patimung tei Patiyatwi, oh Deramungni Bisingtwi no, Saktharmung Naharsinai Kamini Para Committe Honwi. Thowi thangnai Jitendra bai Contact oh Phainairok tei Bwskangni Salo Kulumkwsa wngnairokno, Jotto Lukurokno Corona Test Khlaina Nangnai Honwi, Kaisa Kwrak Dagimung (Kerong) Rwnai, Kamini Kami Hamkrai Committe Honwi. Aboni Logilogi Bini bini Paithak Samungni Swkang, Paithak Borom tei Kwthang tongphuru ni Bini Mukumurokno Muito Khlaiwi Khakhamani Kok Sakha, Kamini Asst. Secretary Sukumar Debbarma.